關於投資

轉眼又半個月，一個星期一篇的目標原來那麼難達到...

近日對投資方面已經完全沒有頭緒。是因為生活忙碌? 可能是。忙於處理小女的學習；忙於處理小女的行為問題… 想不到學校原來沒有什麼可以幫助，建議就是「勸」和「等」。是因為工作忙碌? 亦可能是。收到風話部門可能不續約，所以要搵工。慶幸又好快有offer，是另一部門的另一份合約post，不過這份新工的前景和機會可能多少少。

最近都有抽新股，揀咗一隻有仿市場專利的，不過抽唔到。另一間銀行ipo，好在拖吓拖吓沒有抽，而家反而大把機會買。

自知能力和時間都有限，沒有用心再去研究公司。再好的公司，得到大家即市場的認同，股價節節上升，一個壞消息，或是一個未達市場期望的業績，可以把股價打得七零八落。分散投資，五隻夠不夠? 十隻夠不夠? 但找十間可以投資的公司已經令人筋疲力竭。畢竟人生時間有限，好好運用時間在有意義的事情上會比較好。

到再有機會加碼時，可能都係考慮2800之類的ETF算了。

有眼光但係冇運氣...

「中國高精密(0591)首日掛牌，暗盤價昨日收報 4.7元，較招股價 4元升 17.5%或 0.7元，今早高見 5.6元，爆升 40％，最新報 5.13元。

高精密指，公開發售部份收到 1.21萬份有效申請，涉及約 3.34億股，超購 12.38倍。 1手中籤率為 30%，需斥資約 8.64萬元認購 1.8萬股才可穩奪一手。」

婚衫

盈盈指住媽媽的結婚相問：「呢D咩黎架?」

媽媽答：「媽咪著婚紗影結婚相。」

盈盈話：「婚衫呀?」

媽媽答：「係婚紗。」

盈盈話：「婚衫呀... 婚衫呀...」

(對於盈盈來說，所有穿上身的都是「衫」...)

Surprise

往公園打鞦韆途中...

盈盈說：「盈盈大個啦，唔使抱啦。」

********

打完鞦韆想去玩滑梯，剛巧有一隻大花貓坐在滑梯上...

盈盈唔肯去玩，說：「唔駛驚呀...你唔駛驚呀...」

(麟記translate：「好驚呀...我好驚呀...」)

冇得再耍

盈盈：「打韆鞦喺邊呀?」
麟記：「出面落雨冇得打呀...」
盈盈：「出面冇落雨...」
麟記：「...快d做功課啦...」
盈盈：「...」

Photoshop書

影了很多相，構圖較為好的要修飾一番再拿出去哂，所以想學用PHOTOSHOP，但PHOTOSHOP CS係一件「搵食工具」，所以好貴，盛惠三千多元，所以選擇「家用版」 - PHOTOSHOP ELEMENTS。

軟件到手，然後要找些MANUAL教學書本之類，教PHOTOSHOP的書藉汗牛充棟，去圖書館和書店找過，但大部分都平鋪直述(以COMMAND作基礎)，悶到嘔泡，毫無新意，最要命的是那些書藉的作者都欠缺攝影技巧，其中一本的一張照片是作者(應該是吧)的一張連鬚都未剃的抱仔突兀生活照，睇到我不想再看下去...

終於，發現原來其中一位寫過攝影手冊的作者原來亦有寫PHOTOSHOP書，從AMAZON訂了回來，略看了一些篇幅，寫作手法是以目標為本(例如如何去除雜物、如果去黑眼圈、如何瘦面...)，真的比其他的好很多，終算有個依據作起步點。

********

FACEBOOK的HAPPY FARM近日出現很多BUGS，玩到無癮，所以返來寫BLOG。

********

網上虛擬應用軟件同股市一樣，最HOT的，未必是最好的...

三個最不想人問的問題

昨天收到一個好耐無打過嚟嘅人兄的call，問了三個我最唔鍾意人問我的問題...

1. 點解份工仲係contract? 幾時轉perm? (我夠想知la...)
2. 揀小學的問題：什麼直資... 一條龍... etc. (呢樣嘢我已經聽到好煩，我唔明點解一年交咁多稅仲唔可以享受9年免費教育要走去讀變相私校的直資，呢d係正苦的陰謀，要陰乾你地班自認所謂中產...)
3. 幾時生第二個?(同我真係熟的你唔問我都會話個原因俾你聽...)

敷衍了一陣就收線了。

********

股市方面，上個星期懶係醒出咗小小貨，你都咪話唔邪，跟住係咁升，次次都係咁... 但係唔出又俾身邊人依依哦哦... 好煩 -.-

香港公園

Taken with Tamron 90mm F/2.8 1:1 macro...

大埔火車博物館

花與雲

好耐無見

各位朋友(如果仍有的話)，真係好耐無見，上一篇文原來已經係7月，而現在已經係9月，點解咁耐唔寫BLOG?

一般公式答案係工作忙、湊女忙、家務忙等等，對於我來說，這些是事實，但事實上唔見得會忙到連網都唔上，我忙得黎仍會探親友、返教會、帶阿女返興趣班、影相，所以忙並不是唔update個blog的理由。

實情是，對寫blog的興趣冷淡了，失去了動力，唔識點樣再寫一篇文出來，什至，連睇其他人的blog的興趣也沒有，現時有睇的「連續劇」，只有ckm001同hiking，前者每天固定時間早上9時01分update，娛樂和教育意義並重。後者講行山再加上美麗的風景相，兩者皆是我的興趣。

其實，我的時間主力放在FACEBOOK上，最近開始重新認真學攝影，主要影o靚模(即係阿女)同風景，而FACEBOOK放相十分方便，拍攝完後，與FRIENDS在FACEBOOK分享作享拙作，亦是一件樂事。時間就是花了在那裡。

無錯，在BLOG這裡都可以放相，但其於之前定了「在BLOG裡不放自己和阿女的照片」的原則，所以這裡以文字為主。

好了，說了這麼多廢話... 投資方面，基於唔識再估市，現時都係一動不如一靜，主力仍是渣兜、蕉仔、壽頭和手提。既然之前一年咁差都捱得過，而家更加唔會身痕郁來郁去，又出又入吧，出少少等跌市，個平均價又唔可以拉低很多，出得多，又唔知應該跌幾多才買番，贏粒糖輸間廠，不智。

白兔仔

盈盈的作品...

佢又唔介意喺本身有字的紙上繪畫，真環保。

口頭禪

最近聽得最多的說話...

「咩嘢嚟ga? 咩嘢嚟ga! 咩嘢嚟ga!!!」

「爹地喺邊呀? 媽咪喺邊呀?」(其實我哋就喺佢旁邊...)

總括來說，同之前比較，最近一兩個月盈盈的進步頗快，認字咭都大致全部認到，中文字大約40個，英文字和數字都沒有問題，但未懂數數，4個橙可以數到10個出來!

唔通幼兒的發展係呈梯級式的?

砌lego

最近買了一盒lego(duplo)俾盈盈，估不到她很喜歡玩，原來女孩子都喜歡砌lego的，希望能為她培養一d創意和想象力。

呢張係「檯」...



呢個係「牙刷」!

玩嘢??

麟記(拿住一張狗仔的圖)問盈盈：「呢隻係乜嘢嚟?」
盈盈：「wow~ wow~ 狗仔~」

麟記(拿住一張雀仔的圖)問盈盈：「呢隻係乜嘢嚟?」
盈盈：「吱吱吱~ 雀仔~」

麟記(拿住一張貓仔的圖)問盈盈：「呢隻係乜嘢嚟?」
盈盈：「喵~」

麟記(拿住一張馬的圖)問盈盈：「呢隻係乜嘢嚟?」
盈盈：「喵!」
麟記：「係馬呀...」

麟記(拿住一張汽車的圖)問盈盈：「呢架係乜嘢嚟?」
盈盈：「喵!」
麟記：「係汽車...」

麟記(拿住一張船的圖)問盈盈：「呢架係乜嘢嚟?」
盈盈：「喵!」

麟記(拿住一張飛機的圖)問盈盈：「呢架係乜嘢嚟?」
盈盈：「喵!」

麟記：「點解乜都變哂喵㗎?」
盈盈：「喵!喵!喵!哈哈嘿嘿~」

看來盈盈真係長大了，識「玩嘢」了...

mac & dv

自從盈盈出世之後，為她拍了很多照片和video，一直都很想把那些照片和video轉做DVD，可以一放入DVD播放機就自動在電視機播映，最好還可以自制選單，可以將video分類為不同月份。

於是四出不斷找尋video editing software，知道PC有ulead的出品，但是價錢頗貴，大約要700-900蚊，不想花了錢買才發覺不合用。

亦曾經用過Linux的DeVeDe，可以做到基本的要求，但功能較弱，選擇較少。

從別人口中打聽得知Apple的iMovie是一套頗佳的家用剪片軟件，但是，呢套software只有mac的版本，換言之，要得到一部使用mac os的電腦才可以有機會用。

唔夠錢賣新機，只可從二手市場中著手，賣了本身手上的netbook，有多一點空間可以選擇，在yahoo拍賣找到一部二手iBook G4，價錢頗為合理。

呢部05年中的產品可以暢順的運行隨機附送的iMovie和iDVD(唔使另外俾錢買可以慳幾百蚊)，而且還有IEEE1394插頭，同我部古董dv攝錄機簡直是天作之合。

終於可以剪片，並已成功制作了一些DVD，盈盈仲睇得十分開心。

自從盈盈開始識同人簡單溝通之後，忽然覺得她長大了很多，看來要珍惜時間幫她盡快拍多D video，給她將來多一點回憶。

復活節假期

難得有連續幾日假期，這幾天沒有外遊，而是一家人與盈盈出外遊玩，上星期去了廸士尼(全家人都是第一次到訪)，這兩天到了淺水灣和濕地公園，行程緊密，盈盈玩得很開心，很倦但都值得。

盈盈學講話有很大進度，而家會在平日生活中把握所有機會教她認識多d事物。盈盈也十分喜愛唱歌和繪畫，有時什至用唱歌表達心情；至於繪畫，現時可用「畢加盈」來形容...

********

假期也有點時間睇番一d財經報紙，一眾專家都睇淡長線投資的前景，現時仍堅持長線的彷忽成為了傻仔，專家或扮專家的都找到他們的理據，當然，在現時的氣氛下找這些所謂理據有何困難? 在一年多前大家一片看好時同樣可以找到很多支持的理據，究竟長線投資是否已out? 或者要繼續做傻仔去引證，講得太多了，留番俾d聰明人繼續講吧。

Very Disappointed

盈盈今日去見學校，非常失望! 表現好差! 太怕羞了! 喺屋企好多嘢都識講，但一見陌生人就一粒聲都唔出，唔識對答，身為父母，你話我們有沒有教她? 當然有! 但她有她的一套! 迫又迫過，勸又勸過... 她在人地面前的表現，好似我地唔識教女咁...但我見一d唔理仔女的父母，佢地d仔女反而好醒，越來越替盈盈將來擔心，會唔會唔夠人爭?

********

4月13日後記：收到結果，入了waiting list... 細心想想，每個小朋友都有他自己的「時間表」。

歌唱表演 - 演後篇

一如所料，盈盈在台上只有企的份兒。我們坐得較後，盈盈只係不斷在台上望望望，看來想找我們，我們曾經向她揮手，可是她看不到。幸好，盈盈沒有哭或扭計...唱第二次時還肯和同學們手拖手圍圈，不過個頭仍然係擰轉搵我們!

表演後回觀眾席，有一個同學向盈盈打招呼，我們問她盈盈在學校乖唔乖，她說盈盈最鍾意「食玩具」! 原來如此...

點都好，第一次登台，美好的回憶...

********

有關幼稚園方面，之前報了一間半山區所謂名女校，收到面試信，竟然係星期四interview! 看來該學校為設立hurdle，無所不用其極...

我們預計的hurdle...
阿媽要返工，不在家照顧女兒，out!
爸爸不和媽媽一同來面試，out!
行路上來，唔係揸車，out!
...，out!

用linux的好處

1. 上網唔怕中木馬。
2. 以最經濟的方法做file backup，由於同一部pc可以同時安裝windows和linux，可以把file(例如bb的相片和video)的backup副本放在linux系統中，就算windows果邊中毒，linux那邊都唔會中毒(incompatible的好處)，linux仍可正常使用及boot機，可以recover番d file。當然hardware問題另作別論。

歌唱表演

盈盈所讀的幼兒園即將參與歌唱比賽，以她今天仍是牙牙學語的情況，當然不能比賽。然而，仍可以登台表演...

表演歌曲是家傳戶曉的「小小姑娘」：

小小姑娘 清早起床 提著花籃上市場 穿過大街
走進小巷 賣花賣花聲聲唱 花兒真美 花兒真香
沒有人買怎麼樣 滿滿花籃 空空小囊 怎樣回家見爹娘

(重唱)

仔細睇睇歌詞，可以理解為稱許小女孩要出街賣花幫補家用非常孝順；又可以理解為描寫童工狀況的問題；「怎樣回家見爹娘」什至可能暗示家人虐待兒童的問題...估不到一首短短的童謠可以有咁多想像的空間。不過唱歌的小朋友們應該不會正在面對這些問題吧，因為他們仍可以讀沒有學劵資助的N1幼兒班。

瑣事兩則

早前，於大家樂吃午飯，吃完飯，喝奶茶。忽然，一位操內地口音的女士對我說：「蝕哂未呀」。嘩! 香港現時好多人都正在「蝕」，但我唔使你呢位大姐特別提示噃。但立即再想一想，佢係咪其實想講「食哂未呀」? OK，我可以接受別人鄉音未改，但我只係剛食完飯，連嘢都未飲完，點都唔算係霸住個位啦。唔該佢唔好咁心急趕我走。我覺得呢d人好冇禮貌，我是不會理會她的。

********

又早前，在街上，見到一位「潮媽」，大叫：「BB呀BB，唔好週圍走呀!」。回到一看，見到她的「BB」原來是一位已經6、7歲的男孩(「潮童」)!

Oh! 「BB」呢個字，我只可以接受形容1歲以下的初生幼兒，自從盈盈1歲以後，我便稱呼她為「盈盈」或全名。聽到有d阿媽叫6、7歲的兒子做「BB」，實在令人打冷震!

或者果位媽媽覺得很親切及有趣，但我這個路人甲卻覺得這樣只會令人覺得兩母子都不成熟而且智慧有限!

又10k

跑開有癮，今年繼續跑，今年練習比去年多，但其實都係少，一月才正式開始練(唉...)，仲隔了一個農曆新年。沒有什麼大目標，只係希望比去年跑得快，快少少都好。以現在狀態，不可能一小時內完成，70-75分鐘已經好好了。

********

跑完了，開始六公里都可以維持7分鐘一公里，70 – 75分鐘的目標也許可以達到，心情輕鬆，身體運轉暢順。可是到了四公里checkpoint之後，開始想找洗手間，但見到洗手間長長的人龍，只有忍著…然而到了六公里checkpoint之後，不可能再忍了，排隊排了5 – 6分鐘，期間吹了一會涼風… 到再次起跑，發覺整副引擎再不能全速起動，很難跑起，最終成績(扣除那排隊的5分鐘)比去年還差一點點，唉~

今年練習得多了，但跑之前一天有少許著涼，喉嚨痛，比賽之前渴多了一點冷水，可能這是原因吧… 反而比賽完成之後出了一身大汗，身體沒有再不適(可能d汗將病帶離了身體)，所以有云運動對身體好是有根據的，點都好，要將跑步當成一個習慣，身體才會好。吸收了今年經驗，明年一定繼續參加。

私人網誌?

近日一d睇開的blog，變了所謂「私人網誌」。

有個投資網誌，個網主睇落幾好人，又有東氏老人家的文章，但其後變了「私人網誌」，我曾經查詢如何加入，但答覆竟然係要附上真實姓名(呢個都可以俾)、年齡(有何關係? 18歲以下唔俾睇? 65歲以上有半價?)、職業(同睇blog有何關係? 無業人士唔俾睇?)、電話號碼(oh no! 我唔想再收多d叫人借錢的電話)、email address...

嘩大佬，呢d係個人資料，係私隱，點可以隨便俾人知?

我都有私人日記，但我唔會叫人來睇。

如果真係私人的東西，唔該收埋喺自己個夾萬度再加多兩三把鎖，唔好好似果d yahoo牌紙箱放喺街邊然後貼張紙在上面話「係呀我有嘢睇但唔俾你睇哈哈哈」...

新年快樂

祝各位讀者新年快樂，身體健康，事事順利，人人有工做，有剩餘可以襯呢個時候儲多d好股!

我的新年願望係希望盈盈快點識講嘢，脾氣好d，身體健康，專心學習。