2006年11月24日

「灰姑娘」

七月十七日的blog講過(192)聖安娜,當時結論係公司手頭現金多,但是,飽餅業市場競爭劇烈,盈利難以有大幅增長。

不出四個月,(8052)利亞零售(即OK便利店)提出收購(192)聖安娜。市場認為利亞零售的收購行動可加強該公司的業務整合,我估計除此之外,聖安娜手頭的現金亦是誘因之一。

(8052)利亞零售同(494)利豐有關(由溤國經博士持股55%),OK便利店的經營也日漸改善,舗面比7-11光鮮及整齊,雜誌種類也稍多一點,與「OK大俠」年代相差很大了。(494)利豐的經營手法實在不能睇小,此股值得留意。

(192)聖安娜是「灰姑娘」,耐心持有可等待王子青睞以得到豐厚回報。但是事情發生之前又怎樣知道手上的是「灰姑娘」?買股純綷博私有化,同買舊樓博收購差不多,都是投機心態居多,我認為是不太聰明的投資行為。

(有人話買舊樓等收購期間可以收租,但舊樓租客是「租霸」的可能性亦比較大。)

2006年11月20日

Happy Birthday

很久沒有update個blog了,女兒於兩星期前出世,現在忙得要命,BB像父母的磁石,天生就能把我和太太的所有注意力都吸引集中在她身上。女兒出世時比較輕,現在首要任務是把她餵得肥肥白白,加強她的抵抗力。

我是在產房陪著她出世的,出世一刻,心裡的感覺是…其實又沒有什麼大感動,可能太疲倦了(之前一晚在醫院等,沒有睡覺),原來BB一出世就懂得打開眼睛,還要等幾秒才會哭。期待了9個月…不是…是幾年的生命終於面世,而且還那麼「餅印」。天父的承諾實現了。

BB一出世就有她的「性格」,白天管它有幾十人探她,打鑼打鼓,她也可睡得香甜(或扮睡得香甜 – 她懂得單起一隻眼偷看週圍有沒有人,然後扮瞓),到了凌晨,只有父母在家時,就發揮她的本性,不斷「扭計」 – 不論餵奶、換片、著衫(怕冷)、除衫(怕熱)、哄她,也要扭起碼兩小時才安樂,天快亮了,我們也倦得快死了。求天父幫助我倆新手父母渡過這段煎熬的時期。

凑了她兩個星期,我和太太都覺得好像凑了她兩個月。真有點渡日如年。不過,BB已經開始重了點,總算一點安慰。

為慶祝女兒出世,上星期買了一d(945)宏利金融,或者,十八年後可以為她積蓄一點學費吧。

2006年10月21日

保險agent賣基金

最近個保險agent找我,一方面要找數,另一方面他亦以其sales的本能,建議我買基金(主要係以投資相連保險形式)。

究竟買基金好唔好?針無兩頭利,有辣有唔辣,以下係小小個人經驗:

好處:
1. 方便以成本平均法(dollar average)投資(理解為較低風險),即每月以固定金額買不同數量的基金單位,通常呢d計劃年期越長費用比例越低,如果投資合約期較長(e.g.>20年),成本比例大致可能接受。
2. 可以間接買到外國公司的股票,因為有d較冷門的外國股票,連美國預托證券計劃都買唔到。

壞處:
1. 以一筆過形式投資就唔好加入呢d計劃;基金入場費5%(折扣後仍要3-4%),制唔過。

股票基金年費通常1.5-2%,究竟對利潤有什麼影響?

本金:$100,000
年期:20年
每年利潤回報:10%

股票scenario:
$100,000 x 1.1^20 = $672,749

基金scenario(基金年費1.5%):
$100,000 x 1.085^20 = $511,204

difference:$161,545

所以,唔好睇少果1.5%年費

2006年10月17日

唔公平

呢個世界真係唔公平,口大果d就唔駛做,做順民果d就做埋口大果份,最激氣係果樣嘢本來係佢個範圍。

同工不同薪酬本來已經係問題,而家再一下壓下來話要呢幾日做哂,就識叫人做,人工就識減。

香港被呢個無遠見、無腦、怕事的組織管治落去,遲早玩完!

幾時可以達到財務自由,唔駛再受氣同擔驚受怕?

2006年10月16日


藍花楹:一種香港常見的花。

2006年10月14日

理財顧問

今日喺醫院聽完產前講座,出到門口有班女仔請我哋做問卷,睇到間公司係Convoy。

哈!Convoy連呢招都用埋,係咪估有人睇咗李麗珊幫恆生(0011)賣果個廣告後會就騰騰震,以為養大個仔/女真係要四百萬?如果真係,太咗肚後才開始靠佢哋sell果 d saving plan儲錢養孩子,是否邏輯上自相矛盾?一面話養大個仔/女要好多錢,一邊join 佢d saving plan,每月要俾起碼$2000,剩番幾多買奶粉/尿片/番學?

其實通常果d saving plan是用來供孩子將來上大學嘅學費的,恆生(0011)「李麗珊」廣告的表達方式實在有問題。

況且,運動員是提供運動技巧,不是理財技巧...

2006年9月27日

改名

BB就出世,除了睇醫生,添置用品等等之外,另一件重要事情就係命名。

已經諗了十幾個名,好聽的就覺得太普通或者與朋友/熟人的子女重覆,特別的就覺得諧音不好聽,本來諗住自己和太太各自諗一個字,但係兩個字併埋又怪怪的...

BB,您喜歡什麼名字?快快告訴爸爸媽媽吧!

2006年9月11日

Comment on "買樓投資之謬誤"

這篇文章節錄自香港討論區之地產討論:
http://www10.discuss.com.hk/viewthread.php?tid=2289787&extra=page%3D2

我加了一些資料在計算方面,以"編者按"表示。

"買樓投資之謬誤

(以下純屬個人意見)

睇番好多舊thread, 好多post都問人如果買樓投資買邊區或邊個盤好.... 但其實, 如果你買樓既方向係所謂投資而唔係自住, 會唔會捉錯用神呢?

一開始, 除非你自己現兜兜儸住cash, 否則, 你自己供三成問銀行做7成按揭供樓呢樣野, 根本就不可能被稱做投資!! 以一個約200萬既細單位計, 我唔好計你律師釐印裝修電器冷氣同其他零零碎碎既駛費, 當足你200萬成本, 你問銀行借足7成140萬, 當你5釐息, 唔計管理費同差餉,兩年淨利息最少14萬.

[編者按:利息為$135,960,20年供款總利息為$817,452]

即係話, 如果你買完層樓係兩年內昇唔夠7%(最少), 你經已蝕硬, 當然, 我咁講仲未計通漲(if any)加減息(if any)同上述各項洗費, 換言之, 保守估計, 你個層未裝修既屋, 升唔到10-12%你都要蝕, 但係係而家咁既時勢, 真係仲有可能兩年內升10-12%, 你可能又會話, "咁我睇長線既嗟", 但樓係有折舊既, 當而家新盤既開售價經已不段調低貼近二手價, 你估二手樓既昇值空間有幾多? 同時, 未計你可能要付出既維修費用同其他雜項支出, 一間10-15年樓齡既一般屋苑(如非大型的超級屋苑如太古城,黃埔及美孚等, 但現今香港再難有這類規模的大型市區發展), 市場價值若何? 先唔計你賣唔賣得出, 你賣到既價, 可能同你自己最初的購入價相差無幾甚至可能下調數個percent.

[編者按:假設投資20年,每年升值2%(假設香港進入低通脹低增長時期),20年後層樓值$2,971,895]

[編者按:如上計算,投資20年,回報 = $2,971,895 - $2,817,452 = $154,443;年回報約0.27%]

你又可能會話, 咁我可能買完之後出租呢? ok, 先不論你層樓要出租可能要先執一執, 以現在市價計, 一層約200萬的屋出租價介乎HK$8,000至HK$9,000, 我當中位數HK$8,500, 兩年既收租共HK$204,000, 減去HK$140,000最低成本, 得HK$64,000, 再要減去業主要負責的每月管理費及差餉 (每月約共HK$1,000), 即每月最多可淨得HK$1,666. 但為你這每月約HK$1,666的微利, 你又可能要祈求有好租客, 出租屋唔好漏水跳fuse, 仲要千萬唔好加息! 否則, 你個千靚蚊凍過水.....(但事實係, 最近呢兩年, 我未見過有人可以用租客份租檎晒所有支出之餘係仲有淨既!!)

[編者按:假設收租剛好抵銷按揭供款加雜費,投資20年,回報 = $2,971,895 - $2,000,000 = $971,895;年回報約2.4%,約等於通脹率]

[編者按:再者,現時香港租務條例欠租收樓要3-6個月,欠租期間按揭供款要自己孭,而且,層樓越舊租客質數越差,我覺得分析租客是否"租霸"比分析上市公司難很多]

從來, 向銀行貸款買樓再美其名為投資的, 我都不鼓勵. 買樓, 從來就不應該是投資! 如果我有60萬, 我會去買匯豐同中行, 個d就係投資! 你問銀行借錢買樓, 就算"賺"左, 都不是你的. 7成按揭買樓, 同問財務公司借錢抄股票一樣, 無大牛市, 你都係會蝕到企係度!

[編者按:極同意]

樓宇同先進既電子器材一樣, 你買個陣, 一定係稔住自用既, 之後, 無論出左咩新model, 發展商出咩新項目影響你單位既售價, 通通都再唔係你既問題, 亦唔應該影嚮你日後是否出讓你單位的元素."

讀後感

1. 買樓的唯一目的係自住,用作投資其實一點也不吸引。

2. 唔好聽到個agent話有租收就即刻買果個單位,個agent唔包你一定續約及收租的。

3. 相比買收租股,買樓收租風險其實很高。

2006年9月3日

耐人尋味

以前睇「老夫子」,每逢作者諗唔到主題名稱時,就用「耐人尋味」做主題。這篇blog沒有什麼主旨,就以此為題。

星期六會開組,由我帶組,沒有靈感,怎麼辦?查經好不好?查邊卷邊章?定係再來一次主題討論?outing?自由講?祈禱會?現時只想著星期六中午將會同太太一同去qm產房參觀會見到什麼同有什麼事發生。

今日訂了一張bb床和一個三桶櫃,分別要半個月及一個月後才有貨,好在早d去買,否則分分鐘買唔切。

by the way, 招行就快招股,又係時候學以致用,詳細分析。

豈有此理,個舊保險agent竟然寄篇陳永陸「神燈陸」的文章來話係投資建議,唔識當佢係真就此被欺騙,看來早前dismiss他是明智決定。

2006年8月2日

買少見少

信報的「原是物語」同「國金外望」同日摺埋,以後好的財經評論又少兩篇,好彩仲有am730的「中環博客」,而且是免費的。

曹仁超的專欄越來越「行貨」,題材日日差不多,無乜insight,是否曹先生面對信報即將轉手的事實,無心機寫?以後可以慳番6蚊了。

2006年8月1日

八達通

用開東亞信用卡做八達通增值,早前轉左用匯豐信用卡,於是想改用匯豐張卡增值。

七月頭
唔識點做,於是打去hsbc的客戶hotline問...
問:點將八達通增值由東亞轉去匯豐?
答:唔清楚播,幫你駁去card centre la!
(一分鐘後)
問:點將八達通增值由東亞轉去匯豐?
答:card centre線路繁忙,你留低電話la!
問:幾時會覆?
答:兩三日la(!)
(留了電話)

七月中
(無人覆,再打一次電話)
問:點將八達通增值由東亞轉去匯豐?
答:唔清楚播,幫你駁去card centre la!
(一分鐘後)
問:點將八達通增值由東亞轉去匯豐?
答:card centre線路繁忙,你留低電話la!
問:幾時會覆?
答:兩三日la(!)
(再留多一次電話)

七月尾
(仍沒有人覆,於是出email投訴)
(兩日後hsbc覆email,但竟是亂碼)

(再打多次電話)
問:點將八達通增值由東亞轉去匯豐?
答:唔清楚播,幫你駁去card centre la!
(一分鐘後)
問:點將八達通增值由東亞轉去匯豐?
答:card centre線路繁忙,你留低電話la,兩三日後覆你
(怒氣沖沖)問:已經幾次無人覆!少少問題成個月都未解答到?
答:請等等...
(於是接駁到一個類似supervisor的人回答並解決了問題)

匯豐銀行(5)昨天公佈業績,中期賺多10幾%,我對它的賺錢能力沒有懷疑,但經此一役,我決定做佢老闆,不做佢客戶(最少不會再增加對它服務的需求)

2006年7月17日

買唔買得過?

今日收到朋友來email,相約整蛋糕。

講開整餅,令我諗起(192)聖安娜。

"聖安娜(0192)公布,截至06年3月31日止末期業績,錄得股東應佔溢利4096.6萬元,較05年同期倒退30.8%,每股盈利0.193元,派末期息7仙。"

經營利潤率由13%降低至8%。

整餅行業,正是沒有economic franchise的commodity business,入行門檻低,產品的獨特性不高,我今朝可以食聖安娜的面包,聽朝可以食美心果d,後朝可以食mcdonald。

唔出名,生意做不起;出名後業主乘機加租,餅鋪的位置極之重要,因此餅店選地開業的elasticity不高。

做西餅最好賺應該係賣餅咭,錢係落了袋,但估計有很多餅咭流落了民間是不會再出現的。可能因為這原因,聖安娜(0192)的手頭現金偏高,可以派高息。

樓上教整餅學校,可能正是乘這個勢掘起的,滿足了人食餅的要求,同時亦滿足了人的創作慾。隨著顧客(學生)的要求,此行業的入行門檻會越來越高,大陸的低技術勞工搶不到生意,這是一門十分有潛力而高利潤的行業。

將來有人做呢行做到上市,我可能會考慮入股。

2006年7月6日

真係有嘢賣

我有d電腦零件賣:

http://hk.user.auctions.yahoo.com/hk/show/auctions?userID=nsl333888&u=%3ansl333888

登咗喺yahoo成個星期都無人吼,希望有心人睇到出價幫補吓我呢個窮人吧......

第一次喺yahoo出auction,唔知yahoo好唔好得過ebay

ebay香港個site同美國比真係不成氣候

開張大吉

本號今日開張大吉,希望以後多d人幫襯