生意難做

有一位朋友兼教友係開琴行的，主要係教小朋友和青少年彈琴。

最近從他的blog中知道，他遇到一個賴皮客人，罪狀主要係(1)虛報小朋友的學琴級數，以呃少d租琴室費；(2)呃鐘，即原本book咗練一小時，但趁朋友正在忙碌時鬼鬼崇崇練多半個鐘；(3)老屈，book唔到心目中學琴時間就發爛渣要求退學兼退錢，但報名時報名表已經講明沒有合理原因無得退款；最終，朋友敵不過潑婦駡街只好退錢了事。

真係擔心那位學琴小朋友，那位小朋友的父母，多半是希望製造多一個「琴匠」，多於培訓一個有高尚品格的「藝術家」。常言道言教不如身教，實在難以想像這種品格的父母怎可能為小朋友培養合宜的品德。

小盈也遇過這樣的缺德人，有一次，帶小盈去診所打防疫針，有個女人，見到小盈肥肥白白，就逗她又摸她的臉，逗了一陣，那女人的媽媽同那女人話：「阿女你發燒，唔好哄人哋bb咁埋啦…」

「嘩!」麟記心諗：「豈有此理，有沒有諗過bb的抵抗力比你低? 有沒有諗過病菌會傳染bb? 真自私!」置別人的健康不顧，又是一種欠缺品德的表現。

另一方面，現在香港正瀰漫著一股「要大聲才可以爭取到多d嘢」的風氣，相信源自於壓力團體向施政者爭取利益，這樣做並不是錯，但有人將此風引入其他生活的環節中，買賣商品或服務時都用「惡就係大哂」同「大聲就係啱」的原則，同時利用合約的些微漏動搵著數，又以消費者的身份扮作被害一方(因社會普遍認為商人是奸的)，令現在生意真係很難做。朋友開琴行，前期資本開支大(租舖裝修買設備)，營運費用只有舖租和人工，只要勤力d做多幾轉生意都足以糊口，但服務業者碰到賴皮客人都幾煩，因為怕影響商譽。至於賣衫和糖水舖，加埋存貨和現金流的壓力，就更苦不堪言了。

所以，做生意呢樣嘢，為搵食的話，麟記一定不會考慮。